Toqqorsivimmi assartuinermillu sulisartoq

Kangerlussuarmi Mittarfeqarfiit toqqorsiviat pingaarneq ippoq, tassanilu sillimmatissanit mittarfinnit atortussanut akunnittarfimmilu nioqqutaatinut siammarterinissamut toqqortaqarnissamullu toqqorsivimmut sulisuusut akisussaaffigaat.

Toqqorsivimmi assartuinermilu sulisartup nioqqutissap assartugassatut poortornissaa ilinniartarpaa, assartuisarfik, angallassisartoq imaluunniit speditøri attavigisarlugit, aamma toqqorsivimmit ingerlateqqitat nalunaarsortarpai, assersuutigalugillu allaffissornermi qarasaasiakkut ingerlatsiviit, pisiortornerit, nioqquteqarnerit, inniminnikkanik nalunaarsuinerit, toqqorsivimmik aqutsinerit assartuinernillu aqutsinerit ingerlanneqarfii ilinniagarissallugit. Nioqqutissanik assartuinerni atugaasaput nioqqutinik angallassutit, assartuissutit, usit puui ilioqqaavittullu aaqqiissuussiviit, palle’nik kivitsissutit aamma gaffeltruckit. Sulinermut ingerlassat ikiorsiissutillu taakku tamaasa sumilluunniit specialeqarniarneq toqqaraluaraanni atornissaat ilinniarneqartarput. Toqqorsivimmi assartuinermilu sulisartutut ilinniarsimasut tamarmik ilinniassavaat gaffeltruckersinnaaneq, aamma biilimik nalinginnarmik imaluunniit nioqqutinik angallassissutit 3500 kg inorlugit oqimaassusillit (suussuseq B), kiisalu usisaatilittut biilit (suussuseq C) ingerlassinnaanissaat, aammalu usit assartornissaannut nunat tamalaani malittarisassiat ilinniarneqassapput.

Ilinniagarisaq
Ilinniartut suliffimmi sungiusarnermik imaluunniit najukkami inuutissarsiorfinnik ilinniarfimmi aallartitsisunut ingerlassami aallartissapput.
Tamatuma kingorna sapaatip akunnerinik arfineq-pingasunik sivisussusilimmik Saviminilerinermik Ilinniarfimmi inuussutissarsiutinut ilinniarfiit ilinniarfigisassaanni ilinniartut aallartissapput.

Isernissamut piumasaqaatit
Najukkami inuutissarsiorfinnik ilinniarfimmi imaluunniit kommunip kultureqarnermut ilinniagaqarnermullu aqutsisoqarfiani (KUF-imi), imaluunniit suliffissarsiuussisarfimmi ilinniarnermi tiguneqarnissaq pillugu qinnuteqarneq aallartissutaassaaq.

Isernissamut piumasaqaatit (13 skalami soraarummeernermut uppernarsaateqartut)
Meeqqat atuarfianni 11. klasse, minnerpaamik qallunaatut oqaatsini 6-imik aamma matematikkimi 7-imik angusiffiusunik soraarummeernermi karakteerit.

Isernissamut piumasaqaatit ECTS-skalami soraarummeernermut uppernarsaateqartut
Meeqqat atuarfianni 10. klasse, minnerpaamik qallunaatut oqaatsini E-mik, aamma matematikkimi D-mik angusiffiusunik soraarummeernermi karakteerit.

Ilinniarnerup aallartinnera sioqqullugu ilinniartoq 17 ½-inik ukioqalersimassaaq, GF1-ip naanerani biilinik ingerlatsisinnaanermut allagartartaarsinnaassammat.

Ilinniartut suliffimmi sungiusarfissaqarnissaat tiguneqarnissamut piumasaqaataavoq. Suliffimmi sungiusarfissamik nassaarniarneq ilinniartup nammineq akisussaaffigaa, ilinniarfik najukkamilu inuutissarsiorfinnik ilinniarfik suliffimmi sungiusarfissarsiorneranik ilinniartumut ikiuisinnaasarput.

Eqqartuussivitsigut pineqaatissimannginnissaq piumasaqaataavoq.

Ilinniagarisamut iluserisaq
Sivisussusia tamarmiusoq katillugit ukiut pingasut.

Nangitsilluni ilinniagaqarneq
Transportlogistikeritut nangitsillutit ilinniagaqarsinnaavutit.

Ilinniagaq pillugu annertunermik atuarit uani: www.kti.gl