AFIS-operatørinngorit

Paasissutissanik mittarfimmut silamullu tunngasunik imallit AFIS operatørit timmisartunut ingerlateqqittarpaat paasissutissallu taakku aallaavigalugit timmisartup naalagaata aalajangertarpaa timmisartoq missanersoq missannginnersorluunniit.

Suliffik napasuliami alapernaarsuiffimmiippoq suliassannullu annertuumik akisussaaffeqarnermik nassataqartumut qilanaalereersinnaavutit. Ilinniarneq annertuumik piumasaqaateqarfiuvoq kiisalu eqqumaniaqqissaarnissat piumasaqaataalluni.

Ilinniarnerpit ingerlanerani makkua ilinniassavatit:
Sumiissusersiorneq, silasiorneq, psykologi, sillimaniarneq, radiukkut attaveqarneq, computersystemit allarpassuillu. Taakkua saniatigut danskisut tuluttullu radiukkut attaveqarsinnaanermut allagartartaassaatit. Faagit ukua ilinniassavatit:

• Silasiorneq silamillu misissuineq
• Timmisartornermi inatsisit aamma sumiissusersiorneq
• Timmisartornermik ilinniarneq, timmisartut assigiinngitsut atortullu ilinniarnerat
• Sulinermi inuttut piginnaasat

Naatsorsuutigaarput:
AFIS-operatøritut nammineerlutit, anguniagaqarlutit piumaffigineqarlutillu sulisinnaassasutit. Taakkua saniatigut naatsorsuutigaarput:
• Danskisut, tuluttut matematikkimullu pikkorissuusutit
• Politiiniit sillimaniarnikkut akuerineqassasutit
• Pitsaasumik timikkut nukittuujussasutit peqqissutsikkulu piumasaqaatit naammassisinnaagitit
• Akisussaassuseqartutit silaqarlutillu
• Attaveqaqatigiissinnaasutit suleqatiginnissinnaasutillu
• Ulapaarfiunngitsumi imminut suliakkersorsinnaassasutit

Ilinniarneq pillugu paasissutissat:
AFIS-operatøritut ilinniarneq Mittarfeqarfiit Atuarfianni Narsarsuarmiittumi ingerlasarpoq qaammatillu qulit missaannik sivisussuseqarluni. Qaammatit siulliit arfineq marluk atuagarsornermut napasuliamilu alapernaarsuiffiusuusaarfimmiinneq atorneqartarpoq qaammatillu kingulliit pingasut mittarfiutitta arlaanni napasuliami alapernaarsuiffimmi atorneqartarlutik. Ilinniarnerpit nalaani ilinniartutut aningaasarsiaqassaatit. Ilinniarnermut akuerisaassaguit, Mittarfeqarfiit isumagisaanik tigutinnissannut misilitsissaatit nakorsamillu misissorneqarlutit.

Ilinniarnerup nalaani akissarsiat 

AFIS-operatøritut ilinniarnerup nalaani akissarsiaqassaatit, nerisaqarlutit najugaqartinneqarlutillu, kiisalu ilinniarnermi atugassat tamarmik akilerneqarlutik. Ilinniarnerup nalaani akileraartinnani akissarsiaapput qaammammut 10.500,00 kr.

AFIS-operatøritut akissarsiat

Mittarfeqarfiit Radiotelegrafistforeningillu RAF-p akornanni isumaqatigiissutaat naapertorlugit aalajangersarneqarsimapput. Isumaqatigiissut RAF-p nittartagaani takuneqarsinnaavoq.

Ilinniarnerup kingorna ukiup aappaani affaanilu Mittarfeqarfinni sulineq 

Maluginiaqqussavarput Narsarsuarmi AFIS-imik ilinniarneq Mittarfeqarfiit sulisoqarnissamut pisariaqartitaat naammassiniarlugit Mittarfeqarfinni akilerneqartarmat. Mittarfeqarfinni sulinissaminnik soqutigisaqartut ingammik kissaatigaavut. Ajoraluartumik misilittagaqarfigaarput qinnuteqartut naammasiinnarlutillu allami atorfinittarnerat. Kalaallit inuiaqatigiit ilinniartitaanermut pilliuteqarlutik aningaasaliinerat illersorniarlugu  ilinniartut isumaqatigiissusiorfigisimavagut. Isumaqatigiissummi piumasaqaataavoq ilinniarnerup naammassinerata kingorna ukiuni marlunni affarmilu sulinissamik pisussaaffeqarnissaq. Piumasaqaateqarnikkut ’ilinniartitaanermi akiitsutit’ ikiliartortissinnaavatit Mittarfeqarfinni sulininni qaammatit tamaasa aalajangersimasumik akiliillutit. Taamaattumik piffissaq sioqqullugu soraarniaruit akiitsut sinneri akilertussaassavatit.

Atorfininneq

Maannamut AFIS-imik ilinniartut tamarmik Mittarfeqarfinni atorfinitsinneqarsimapput. Tamannali ingerlaannassanersoq nalunarpoq. Suliffissaaleqinissamulli ilinniartitsiumanata pisariaqartitsineq aallaavigalugu ukiut tamaasa ilinniartussat amerlassusilertarpavut. Mittarfimmut suliffigerusutannut pinissat naatsorsuutigisinnaanngilat. Sapinngisamik Mittarfeqarfinni AFIS-operatørit kissaataat tusaaniartaarpavut.

Atorfinitsitseriaatsit 

Kalaallit Nunaanni AFIS-imik mittarfiit ilaat inuilaarsuarmiittuummata taakkunani 1.1-imik atorfininnissamut periarfissaqarpoq. Imatut paasineqassaaq ullormi ataatsimi suligaanni ulloq ataaseq sulinngifffeqartarluni. Ullut taakku ima aaqqissuunneqartarput sapaatit akunnerini arfinilinni sulilluni sapaatillu akunnerini arfinilinni sulinngiffeqarluni. Kalaallit Nunaanni mittarfinni allani najugaqavissuuvutit sapaatit akunnerani ulluni tallimani sulisarlutit. Tassani nunatsinni illoqarfiit anginerit eqqaaniipputit imaluunniit illoqarfimmiillutit sutigut tamatigut periarfissaqarlutit niuerniarnissamullu periarfissaqarlutit.

Sociale medier

Følg med i dagligdagen i de grønlandske lufthavne!

Du finder os på følgende sociale medier...

Uddannelse og job

Er du vores nye mekaniker, kok eller indsatsleder?

Se alle vores muligheder for både uddannelser og job...

Læs mere
Services

Ønsker du reklame eller lejemål i vores lufthavne?

Udover drift af vores lufthavne byder vi på et hav af services...

Læs mere
Hoteller

Mangler du et sted at spise eller sove?

Besøg vores to hoteller i enten Narsarsuaq eller Kangerlussuaq

Læs mere