Mittarfeqarfiit 2017-mi suliffeqarfik eqeersimaartutut toqqarneqarpoq
Mittarfeqarfiit “Suliffeqarfik Eqeersimaartoq 2017”-tut toqqarneqarpoq sulisut peqqinnerulernissaannut suliffimmilu timikkut tarnikkullu nalerisimaarnissaannut suliniutit tunngavigalugit.
Peqqinnissutsimut Naalakkersuisoq toqqaanermini ima naliliivoq:
“Innuttaasut timiminnik atuinerulissappata, kikkut tamarmik ikiuunnissaat pingaaruteqarpoq. Tamatumani ilissi allanut maligassiuiivusi. Inuunerup ingerlanerani suliffimmi nal. akunnerpassui atorneqartarput. Taamaammat Suliffiup peqqinnartumik timimillu atuinissamut periarfissalimmik avatangiiseqarnikkut periarfisseeqataanissaa pingaaruteqarpoq. Ilissi sullivimmi avatangiisit pitsaasut, sulisut peqqissusaannut inuunerminnillu naleqartitsinerannut tuniluuttarnerannut isumassarsititsivusi.”
Mittarfeqarfinni pisortaaneq Marie Fleischer oqarpoq:
“Sulisugut inuunerminni akunnerpassuit sulinermut atortarpaat. Taamaammat sulisitsisutut akisussaaffeqarpugut sulisut peqqinnerulernissaannut nuannaarlutillu suliartortarnissaannut sinaakkusiinissamut. Upperivarput sulisut peqqissut nuannaartullu sulilluarnerusartut”.
Peqqinnerulernissamut suliniut HR Immikkoortortami nammineq piumassutsiminnik suliniummik ingerlatsisunik aqunneqarluarsimavoq tassanilu pilersaarneqartarluni aasaq ukiorlu immikkoortillugit sapaatip akunnerani marloriaq akunneq ataaseq qanoq atorneqassanersoq. Aammattaaq namminneq kajumissutsimikkut suliniummik ingerlatsisut suliffeqarfik unamminermut ilannguppaat.
Suliffeqarfik eqeersimaartutut toqqangaanermut kr. 25.000 tunniunneqartut namminneq kajumissutsimikkut suliniummik ingerlatsisunut qujassutitut suliffimmi annertunerusumik peqqinnerulernissamik suliniutinut atorneqassapput.
