Sulisoreriikkanik atorluaanikkut mittarfinni ingerlatsilluarneruneq

Mittarfeqarfiit niuernerpalaartumik ingerlatsinerulernissamut periusissiaannut atatillugu mittarfinni suleriaatsinik ukiuni kingullerni pitsanngorsaapput. Sulisut ataatsimoorlutik amerlanerusunik suliaqarsinnaanissaat Mittarfeqarfiillu taamaalillutik mittarfinnik ingerlatsilluarnerulernissaasa qulakkeernissaa siunertaavoq. Inuiaqatigiinni aningasaqarnermut iluaqutaavoq suliassaqarfiillu ilaannut atatillugu napparsimasoqaraluaraangat timmisartut helikopterillu mittarfiisa ammaannarnissaat qulakkeerneqarluni.

Kalaallit Nunaanni mittarfiit mikisunnguupput taamaammallu sulisut amerlanngitsut assigiinngitsunik suliassaqarput, soorlu qatserisartutut annaassiniartartutullu, ilaasunik nassatanillu isumaginnittutut, timmisartunik attaveqaqateqartussatut allarpassuarnillu. Sulisut suliassaqarfimminni specialistiutigalutik allanik suliaqarsinnaanissaannik tamanna piumasaqaatitaqarpoq. Suliassaqarfiit tamarmik immikkut ilinniagaqarsimanissamik ilitsersorneqarsimanissamillu piumasaqaatitaqartut.

Ineriartorneq tamanna ikorfartorniarlugu Mittarfeqarfiit immikkoortortaqarfiarannguaqarput, ilaatigut arlalinnik suliassaqarnermik suliaqartumik. Suliassamik tamassuminnga Ground Handling Manager Gaba Lennert-Kleemann isumaginnittuuvoq.

– Assersuutigalugu Kastrupimut sanilliullugu nunatsinni timmisartuussinerit amerlanngillat. Taamaammat suliassat agguataartariaqarput. Annertunerusumik annikinnerusumilluunniit taamannak suleriuseqartuarsmavugut, massakkulli aaqqissuussamik ingerlalernissaa aallartisarsimavarput, Gaba Lennert-Kleemann oqarpoq.

Assigiinngitsunik suliaqartitsinerup aaqqissuussamik ingerlalernissaa pivoq ingerlatsinerup pitsaanerulernissaa timmisartortitseqatigiillu suliarisarsimasaasa tigunissaat siunertaralugu. Mittarfiit ilaanni ilaasunik nassatanillu isumaginninneq ilaatigut Air Greenlandimit isumagineqarput. Suliassarli annertunngimmat tamatigut imminut akilersinnaasarsimanani. Suliassat Mittarfeqarfinniit taamaammat tiguneqarluarsinnaapput mittarfinni sulisoqareernertik pissutigalugu. Aasianni Paamiunilu mittarfinni ilaasunik nassatanillu sullissinermi suliassat kingullertigut tiguneqarput.

– Assigiinngitsunik suliaqartitsinermik eqqarsartariaaseqarneq suliassaqarfiit killinginik sulisunullu unammillernartortaqarpoq. Suliassaqarfimmut ilinniagaqarsimagaanni piginnaasanillu nutaanik ilinniaqquneqarluni tamanna qulartitsisinnaavoq. Misilittakkattali takutippaat taamannak assigiinngitsunik suliaqartitsineq amerlanernik iluaqutissartaqartutut isigineqarmat, Gaba Lennert-Kleemann oqaluttuarpoq.

Assigiinngitsunik suliaqartitsinermut iluaqutaasut ilagaat napparsimasoqartillugu pilersaarutaanngitsumilluunniit pisoqartillugu mittarfinni suliassat nammineq isumagineqarsinnaanera pissutigalugu aningaasartuutinik annikinnerutitsinera.

Tusagassiorfinnit attaveqarfissaq:
Paornánguaq Kleist
Mittarfeqarfinni attaveqaqatigiinnermut pisortaq
Mobiili: +299 597474
E-maili: paok@mit.gl