Kangerlussuarmi mittarfik iluarsaanneqartoq
Aasap ingerlanerani mittarfiup iluarsaannera Mittarfeqarfiit sulisuisa ulapputigisimavaat.
”Suliaq annertusimavoq. Siullermik atortussat ilinniaqqaarpagut, tulliatigullu asfaltilersuinerpiaq suliarilissallutigu,” assartugalerisoq Jørgen Boller oqarpoq.
Suleqatigiit arfineq-marluusut mittarfiup iluarsaanneranut qaammatini pingasuni sulipput.
”Atortut ilikkaratsigit suliaqarnerput sukkatsippoq. Mittarfik assut kusatsillunilu angallaffigiuminarsivoq. Siullermik maniilaqartarneri pissutigalugit assersuutigalugu sweeperimik ingerlataqaraangatta arriillisariaqartarpugut, maannakkulli qanorluunniit sukkatigisumik ingerlaannarsinnaalluta.
”Asfaltit tonserpassuit atorpagut. Juunip aallartinnerani Danmarkimi asfaltiliorlunilu asfaltilersuinerup iluani suliffeqarfiit siuttut ilaat Colas ikiortigaarput. Juulip qaamataanit avataanit ikiorserneqarata nammineq asfaltiliorsinnaalerpugut, asfaltilersuisinnaalerluta, aamma asfaltimik iluarsaassisinnaalerluta,” Jørgen Boller oqarpoq.
Asfaltimik qapiaasartumik aammalu asfaltiliortarfimmik angallattakkamik Mittarfeqarfiit aningaasaliisimavoq, aappagumullu Air Greenlandip hangareqarfiata sioraani unittarfiusoq suleqatigiit iluarsaallugu aallartissavaat.
