Mittarfeqarfinni ukiunik foorunngortorsiortoq
Jimmy Gudmandsen (60), 1982-ip aallartisimalernerani ullumikkut Mittarfeqarfinngortumi atorfinippoq. Nuummi Mittarfeqarfiup biilileriffiani terminalarbejderitut atorfinippoq ukiunilu qulikkaani sisamani terminalarbejderiulluni, sulisunik aqutsisuulluni, annaassiniarnermi aqutsisuulluni mittarfimmi pisortaavoq.
2016-imi pitsaassutsimut immikkoortortamut pivoq ullumikkullu isumannaallisaanermut immikkoortortami OPSCOM-manageriulluni.
– Ullumikkut nalliussisaq immikkorluinnaq ittuuvoq. Jimmy-ip pimoorussinera suliffittut kajungernartuunitsinnut, amerlasuunik pissanganartunik immikkoortortaqaannarata periarfissarpassuaqaannaratalu, suliffitsialaalluta suleqatigiit akunnitsinni pitsaasumik attaveqatigiinnitsinnut takussutissaavoq, pisortaaneq Henrik Estrup oqarpoq.
Suliffeqarfimmi ukiuni taama amerlatigisuni aalaakkaasumik sulinermut suna patsisaanersoq apeqqummut Jimmy Gudmandsen ima akivoq:
– Ulapaarluni sulineq nuannarisaraara – Ullut tamaasa suliassat taakkuugaluit ullut assigiittanngillat. Ullut tamaasa suliat inerneri takuneqarsinnaasarput kikkullu tamarmik suliassatik sunissartillu ilisimaaraat. Taamaannera nuannaraara. Piffissap annersaa suliffimmi atorneqartarmat suleqatit qanimut attavigineqalersarput, taakkulu ilaqutartaatungajak isigineqalersarlutik.
Jimmy-ip nammineq kissaataa naapertorlugu suleqatit peqatigalugit Mittarfeqarfiup sutortarfiani kaffillernikkut kaagillernikkullu ulloq nalliussineqassaaq.
