Mittarfinni aqqusaartarfiit angalasuinnarnut atorput
Namminersorlutik Oqartussat katersuuttunut tunngatillugu killilersuutit pillugit nalunaarutaat malillugu Mittarfeqarfiit aqqusaartarfii taamaallaat ilaasunit aallariartortunit, imaluunniit tikeqqammersunit atorneqaqqusaapput.
Ajoraluartumik aqqusaartarfiit ilaasunik aallariartortunit imaluunniit tikeqqammersunit atorneqarnissaat pillugu aalajangersagaq amerlasuut malittarinngilaat.
”Timmisartukkut angalasunut Namminersorlutik Oqartussat aalajangersagaannut tunngasunik Mittarfeqarfinniittugut angalasut ilisimatinniarnerinik iliuuseqartuuvugut,” qullersatut pisortaq Henrik Estrup oqarpoq.
”Allagartarsuarnik sanavugut, aqqusaartarfinnik taamaallaat angalasut atugaqarnissaannik sulisugut ilitsersorneqarsimapput, sociale media aqqutigalugu arlalinnik saqqummiussaqarsimavugut, aammalu aqqusaartarfinni atuffassutaasartunik nalunaarutit immiussimavagut. Taamaattorli aqqusaartarfiit angalasuinnarnik atorneqaqqusaaneri pillugit aalajangersakkanik suli amerlasuut malittarinninngillat.”
”Maannakkut KNR-imi radiukkut nalunaarutit ilaliuppagut. Oqariartuutigut innuttaasunut suli annermik siammartinniarlugit taama iliorpugut. Immitsinnut paarisarinissarput, aammalu nakorsaanerup aamma Namminersorlutik Oqartussat atugassiaannik malittarisassat malittarinissaat pingaaruteqarluinnarpoq,” Henrik Estrup oqarpoq.
