Narsarsuarmi orsussaarniarfiup eqqaani ikummatissamik annikitsumik aniasoqarsimavoq
Marsarsuarmi orsussaarniarfimmi orsertarfiit nutaat ilaanni pakninngi ussiitsoq ikummatissamik aniasoqalerneranut patsisaasoq pissutaalluni, piffissap ilaani nunaqarfimmi benzinamik orsertoqarsinnaasimanngilaq. Kommunimi upalungaarsimatitat pisumik ilisimatinneqarput.
Orsussaarniarfik inuinnarnit annikitsuinnarmik atorneqarmat Mittarfeqarfiillu biilii pingaarnertut dieselitortuummata, ikummatissamik kuuttoqarsimanera, mittarfimmik ingerlatsinermut namminermut sunniuteqarsimanngilaq.
– Taama pisoqarnerata – pingaartumik Kulusummi qanittukkut ajutoorneq eqqarsaatigalugu- ajuusaarnartuunera qularutissaanngilaq. Maannali annikitsuinnarmik aniasoqarsimanera maluginiarparput, Mittarfeqarfinni teknikkeqarnermi pisortaq, Mike S. Kristiansen oqarpoq.
Benzinamik orsersinnaanngikkallarsimanerup saniatigut avatangiisinik saliineq ingerlanneqarportaaq.
– Eqqortumik sukumiisimillu saliinissaq qulakkeerniarlugu, avatangiisit pillugit siunnersorti, arlaannaannulluunniit attuumassuteqanngitsoq isumasiorsinnaasarput attavigaarput. qanoq ililluni taama pisoqarsinnaanera, taamaalisoqaqqinnginnissaalu anguniarlugu qanoq innersuussuteqarnissaa paasiniarlugu, tunisassiortoq aamma attavigaarput. Orsertarfimmi nutaangajaasumi kukkunerussammat, suliaq qulanaveeqqusiinermut tunngasutut ingerlapparput, Mike S. Kristiansen oqaluttuarpoq.
Polar Oilip umiarsuaa, ikummatissamik benzinamik Narsarsuarmut pajuttoq, maajip ulluisa aallaqaatanni tikissaaq.
