Qaarsuni mittarfimmik iluarsaassineq
Qaarsut Mittarfianni pisortaq, James Nielsen:
”Mittarfinni sulisut sapaatip akunnerini kingullerni marlussunni ulappussimapput. Suliarujussuannut annertoqisumut nersualaarusuppakka. Sapaatip akunnerini kingullerni marlussunni sapaatip akunnerisa naaneri tamaasa suliffigisarsimavaat, maannakkullu kiisami sapaatip akunnerata naanera pisassarilluarlugu sulinngiffigisatut atussavaat.”
”Ataasinngornikkut, marlunngornikkut, sisamanngornikkut aamma tallimanngornikkut timmisartoqarfiuvugut, taamaattumillu pingasunngornerni aamma sapaatip akunnerisa naaneranni nungullarsimaffiit suliarisinnaasimavagut,” James Nielsen oqarpoq.
Sapaatip akunnerini kingullerni marlunni Qaarsuni mittarfik iluarsaanneqarlunilu narlorissarneqarsimavoq.
Siorna mittarfik qulaallugu Asiaq dronit atorlugit assiliisaqattaarpoq, kingornatigut nunatap ilusaanik ilutsimik sanalluni, aammalu mittarfiup qanoq issusissaatut ilusaasussamik titartaalluni.
”Ukioq taanna Qaarsuni autograderimi GPS-imik tunngavilimmik aqutsivimmik suliffeqarfik Leica inissiitipparput, taamaalilluni GPS iluaqutigalugu mittarfik siunissami iluarsaanneqarsinnaallunilu narlorissarneqarsinnaassammat,” suliniummik siulersuisoq Erneeraq Zeep oqarpoq.
Graderi tassaavoq aqqusinermik narlorissaassutitut assakaasulittut angallat, taassumalu siunertaraa aqquserngup qaanik narlorissaanissaq, imaluunniit maani pineqartutut ujaraaqqanik mittarfiup qaavanik narlorissaanissaq.
”Mittarfiup narlorissarsinnaanissaa sioqqullugu ujaraaqqanik atortussat atortariaqarput, tamanngalu suliarinnittuuvoq KBK Entreprise. Suliaqarneq immikkoortukkuutaarlugu ingerlanneqarpoq, taamaalilluni Air Greenlandip pilersaarutigisaatut timmisartuussisarnissai unitsinneqassanngimmata,” Erneeraq Zeep oqarpoq.
Siorna taamatut iliorluni Qaanaami mittarfik iluarsaanneqarpoq.
