Mittarfik ivigaasanik qallersugaq
Mittarfeqarfiit Qaarsut Mittarfiata saavatungaani ivigaasalimmik pilersitsimavoq.
Qulimiguulik ujaqqanik eqqortittoorsimalluni ajoqusernerata kingorna, Miitarfeqarfiit Qaarsuni, Air Greenland`ip kissaatigisaa naapertorlugu, mittarfiup saava tungaani ivigaasanik ilioraasimavoq. Mittarfeqarfiit qullersaqarfii Trafikstyrelse Mittarfeqarfiit qinnuteqaataa akuereqqammerpaa, tassalu ivigaasanik atuisoqarsinnaanngorluni.
Air Greenland Qaarsut Mittarfeqarfia Dash 8 timmisartuinik aamma qulimiguulinnik timmisartuussiffigisarpaa, Mittarfeqarfiillu taamatut suliaqarsimalluni inerniliinera Air Greenlandip nuannaarutigaa.
– Ivigaasanik ilioraanermi qulimiguullip aallalernerani minneranilu ujaqqanik eqqortinnaveersaarsinnaanngorpoq, tamannalu tamatta nuannaarutigiinnarsinnaavarput, qulimiguulimmik timmisartuussineq nunap immikkoortuani pingaaruteqaqimmat, Air Greenlandip Operations`inut pisortaa John Nielsen oqarpoq.
Ivigaasat ninngusoorujussuupput allaallumi Mittarfeqarfiit aputaajaataannik aqqusaarneqarsinnaallutik.
– Timmisartoq imaluunniit qulimiguulik sioralimmut mikkaangat, taava tamatigut ujaqqanik eqqortinnissamik aarlerinartuaannarpoq. Qulimiguullip miffissaani Ivigaasanik ilioraanitsinni, atuisartuvut ajunnginnerusumik sullissinermik neqeroorsinnaanngorpavut, ikioratsigik sivikinnerusumik iluarsartariaqalersut ujaqqanik eqqortikkunnaartussaammata – aammaluunniimmi miffissaa kusanarluinnarami qorsuulluarluni, Mittarfeqarfiini Ingerlatsinermut pisortaq Niels Grosen qungujulluni oqarpoq.
Mittarfittaani nunaminertamut ivigaasanik ilioraaniarnitsinni oqartussaasut qinnuteqarfigeqqaarpavut. Ivigaasat assingorpasipput arsaattarfinni takusartakatsinnut illoqarfinni assigiinngitsuni, kisianni assigiinngitsutigut allaanerungaatsiarput. Uku ivigaasat mittarfeqarfinnut qulimiguulillillu mittarfiinut immikkut inerisagaaput.
– Ivigaasat ukorpiaat atorneqarput, misilittagaqarluarmata taakkununnga, nunarsuarmioqatigiinni ukiuni kingullerni atorneqareersimapput. Misilittaatigineqarluarput akuerisaasimallutillu, tassami timmisartut qulimiguulillillu aallalernermi sakkortuumik anoraasuartitsisarput. Aamma ilanngullugu akuerisaapput ikuallatitsinaveersaarnermi atorluarsinnaammata, ikummatissamik kuerarfigitikkaluarlutik ajoquserneq ajoramik aammami mittarfeqarfimmi allatigut ajoqusersorfigineqarsinnaasoqaqimmat, Niels Grosen nassuiaavoq.
Nunaminertaq mittarfeqarfiup saavani qulimiguulinnut immikkoortigaavoq, oqartussaasullu ukiunut marlunnut akuerigallarsimavaat, tamatumap kingorna nalilerluarneqassaaq naggataarutaasumillu akuerineqarluni. Ujaqqanik eqqortinnaveersaarnissaq anguneqassappat, taava Mittarfeqarfiit Air Greenland suleqatigalugu eqqarsaatigiumavaa mittarfeqarfinni allani aamma qulimiguullit mittarfiini allani atorneqalissanersut.
