Unnuk Kulturisiorfimmi igasoq: Nerisassiorninni nerisassiassat ataqqisaraakka
Kalaallit Nunaanni igasunik unammisitsinerit pingasut ajugaaffigigamigit Inunnguaq Hegelundip iggarissuunini tusaamasaassutigilerpaa. Ullumikkut unammisartutut igasuunini taamaatippaa, unammisitsinernili dommeriusarpoq, neriniartarfimmillu pop-up’imik Kalaaliaqqamik iluatsitsereernermi kingornatigut neriniartarfik nutaaq ammassamaarpaa.
– Nerisassiassat ataqqisaralugit nerisassioraangavit mamassusaanut isikkuanullu kinguneqartarnera upperaara. Neqi imaluunniit naatitat asuli eqqakattaaralugit ajunnginnissaa naatsorsuutigissanngilaq. Aamma sulininni atortuutitit akisoqisut eqqakattarneq ajorpatit, iggarissorsuaq Inunnguaq Hegelund nassuiaavoq. Mittarfeqarfinnik suleqateqarluni Unnuk Kulturisiorfimmi Nuup Mittarfiani ooqattaarutissanik igassamaarpoq.
Inunnguaq Hegelundip nerisassiornissani pinngortitami isumassarsiffigisarpaa, siunissamilu Kalaallit Nunaata imminut pilersortunngornissaa takorluugarivaa.
– Nuna namminersulissaguni nuna aamma imminik pilersortuusariaqarpoq. Kalaallit nerisassaataat kusanartumik qanoq nerisassiarisinnaaneri takutikkaangakkit amerlanerit nerisassiassaatitsinnik nerisassiornissaminnut isumassarsinissaat neriuutigisarpara, taamaalilluta nerisassiaatitsinnik atugaqarnerput suli pitsaanerulersissagatsigu, Inuit Silamik suleqateqarluni puisit neqaannik igariaatsinik nutaanik maannakkut suliaqartoq Inunnguaq Hegelund oqaluttuarpoq.
Unnuk Kulturisiorfimmi arfininngornermi 19. januaari 2018, nal. 18.00-imit Mittarfeqarfinnik suleqateqarluni Nuup Mittarfiani igasoq Inunnguaq Hegelund ooqattaagassanik nerisassiussaaq. Nungunnissaasa tungaannut ooqattaagaqassaaq.
